សមត្ថកិច្ចក្រចេះចុះបង្ក្រាបទីតាំងបញ្ចាំលួចធ្វើអាជីវកម្មខុសច្បាប់
04-May-2016 | ដោយ មែន កំសត់
ក្រចេះ ៖កម្លាំងនគរបាលព្រហ្មទណ្ឌខេត្តក្រចេះ កាលពីថ្ងៃទី៣ឧសភាឆ្នាំ២០១៦ បានចុះឆែកឆេរទីតាំងឃ្លាំងបញ្ចាំដែលលួចធ្វើអាជីវកម្មគ្មានច្បាប់ ។ ក្រោយពីការចុះឆែកឆេររករបស់កម្លាំងនគរបាលព្រហ្មទណ្ឌខេត្ត និងស្រុកក្រោមបញ្ជាដឹកនាំពីលោកហាក់ ហ៊ាន់ ព្រះរាជអាជ្ញាររងខេត្ត ទៅលើទីតាំងឃ្លាំងបញ្ចាំដែលលួចធ្វើអាជីវកម្មគ្មានច្បាប់មួយកន្លែង នៅឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ និងបានរកឃើញមានម៉ូតូចំនួនជាង១០គ្រឿង សុទ្ធសឹងជាម៉ូតូអត់ពន្ធសមត្ថកិច្ចបានសម្រេចចាប់រឹបអូសម៉ូតូ ទាំងនោះ មករក្សាទុក ដើម្បីមានវិធានការបន្ត។
លោកវរសេនីយ៍ឯក គុណ សោភណ្ឌ នាយការិយាល័យនគរបាលព្រហ្មទណ្ឌកំរិតស្រាល បានឲ្យដឹងថា ទីតាំងទទួលបញ្ចាំសម្ភារៈមួយកន្លែងនេះ មានម្ចាស់ឈ្មោះ វ៉ា ស៊ីណាត់ អាយុ៣២ឆ្នាំ និងប្រពន្ធឈ្មោះលុនតាំងហេង។ ពួកគេបានលួចធ្វើអាជីវកម្មខុសច្បាប់រយៈពេលយូរមកហើយ នគរបាលក៏ទើបតែស្រាវជ្រាវបង្ក្រាបក្រោយពីមានការចាប់ខ្លួនជនម្នាក់ ពាក់ព័ន្ធនឹងករណីឆបោកម៉ូតូ និងបានលួចយកទៅបញ្ចាំនៅឃ្លាំងខុសច្បាប់មួយនេះ។ បច្ចុប្បន្នម្ចាស់ទីតាំងបានរត់គេចខ្លួនបាត់៕
ចំនួនអ្នកទស្សនា
- ថ្ងៃនេះ4831
- ម្សិលមិញ20231
- សប្តាហ៍នេះ83911
- ខែនេះ105791
- ឆ្នាំនេះ105791
- សរុប20548247